Smá pistill

Á sunnudaginn fórum við til Húsavíkur og dvöldum í góðu yfirlæti hjá tengdó. Sigurgeir náði að fara á einn fótboltaleik með pabba sínum, sem er drjúgur við að fylgjast með fótboltanum því hann sér helst alla leiki bæði í kvenna og karlaknattspyrnuna. Enda búið að heiðra hann fyrir. Ýmislegt höfðum ég og tengdamamma að spjalla um á meðan auk þess sem við skoðuðum handavinnu blöð og létum okkur dreyma um að sauma hitt og þetta stykkið. Eða ég lét mig dreyma hún á sjálfsagt eftir að sauma þau nokkur í vetur. Eftir kvöldmat brunuðum við svo heim aftur.

Í gærmorgunn fór ég svo til augnlæknis hér á Akureyri í fyrsta skipti í sjálfsagt 8-10 ár. Því miður hefur ekki orðið nein bót á þeim búnaði sem er hér á augnlæknastofu bæjarins. Kannski er það allt í lagi og kannski virka tækin eins, ég er samt sannfærð um að ég færi ekki til tannlæknis sem væri með þrjátíu- til fjörutíu ára gömul tæki á sinni stofu og geri það ekki heldur aftur með augnlækni. Jæja en ferð mín til augnlæknisins var tveggja vikna eftirlit eftir aðgerðina og kom það vel út, þannig að næsta skoðun er þegar þrír mánuðir eru liðnir frá aðgerð og það gerir Jóhannes Kári sjálfur.

Eftir vinnu og kvöldmat í gær fórum við skötuhjúin og gengum í Krossanesborgum heillengi þessi staður er þvílíkt fallegur að ég vil ekki síður fara þarna að ganga en að tölta milli trjánna í Kjarnaskógi auk þess sem ég labba beint að heiman þangað en þarf ekki að keyra í hinn enda bæjarins  eins og ég þarf til að fara í Kjarnaskóg. Við hittum á göngu okkar föður æskuvinkvenna minna úr Lyngholtinu sem var að viðra hund dóttur sinnar það var gaman að því.

Læt þetta gott heita í bili.

Athugasemdir

[Steingerður Steinarsdóttir, 13.9.2007 kl. 16:32]

Ég veit ekki hvort ég hef gengið um Krossanesborgir en við Gummi gengum út í Krossanes með tíkina þegar við vorum fyrir norðan síðast. Við gengum yfir klöppina og niður að sjávarbakkanum og meðfram honum. Er það sama gönguleið?

[Aðalheiður Magnúsdóttir, 14.9.2007 kl. 10:00]

Nei maður fer útaf Hörgárbrautinni skömmu áður en maður kemur að Húsasmiðjunni og þar er þetta svæði, hugsa reyndar að það liggju svo niður undir Krossanes. Ef þið hafið farið út fyrir Krossanes þá eruð þið samt á mjög fallegum stað allavega útsýnislega séð.